Mr. Cuimín Mac Aodha Bhuí:

Ní dhearnamar aon suirbhé lasmuigh den Ghaeltacht ach tá a fhios againn ón meid fiosruithe a fhaighimid ó thaobh, mar shampla, teiripe teanga de, gur beirt as ceantar Bhaile Átha Cliath a d'iarr seirbhís teiripe teanga trí Ghaeilge le deich mbliana anuas. Cuir é sin i gcomparáid le breis agus 120 nó 130 gach bliain sa Ghaeltacht. Léiríonn sé sin gur sa Ghaeltacht atá an t-éileamh agus gur sa Ghaeltacht atá an riachtanas agus ní dhéanaimse aon leithscéal má táim agus cuid de mo chomhghleacaithe ag cur na béime ar na seirbhísí don áit ina bhfuil an Ghaeilge á labhairt go nádúrtha ag pobal agus ag clanna. Sílim gurb í an áit gur ceart dom tosú agus is é sin an fáth go bhfuil an bhéim á cur againn ar an nGaeltacht ó thaobh earcaíochta de, ó thaobh na scoláireachtaí de agus ó thaobh forbairt seirbhísí de.