Mr. Gearóid Mac Donncha:

Go bunúsach, nuair a bhí na pacáistí iomarcaíochta ag teacht, d'imigh beirt as rannóg na nuachta a bhí againn i gCasla. Mar gheall air sin, b'éigean dúinn breathnú arís ar an láimhseáil atáimid ag déanamh ar chúrsaí nuachta agus an bealach a bhfuilimid ag cur foirne i dtreo na gclár. Mar sin tá athrú suntasach déanta againn ar an gcaoi a bhfuilimid ag tabhairt faoi "Nuacht a hAon" anois, sa mhéid is go bhfuil an léiritheoir ag obair i gCasla ach tá an láithreoir ag obair i mBaile Átha Cliath. Le cúrsaí teicneolaíochta mar atá, tá an deis againn é sin a dhéanamh. Is rud a chonaiceamar nuair a bhíomar ar cuairt ar BBC na Breataine Bige agus in áiteanna eile, go bhfuil siadsan ag déanamh cláir ach iad ag teacht ó dhá áit dhifriúla. Den chéad uair anois táimid ag déanamh é sin chomh maith agus ciallaíonn sé sin go bhfuilimid in ann daoine a bhí ag obair in áiteanna eile a threorú i dtreo "Nuacht a hAon". B'shin an fáth go bhfuil "Nuacht a hAon" tagtha ar ais ar an aer mar a bhíodh.