Catherine Connolly (Galway West, Independent) | Oireachtas source

Míle buíochas. Tá ardmholadh tuillte ag na finnéithe agus cuireann sé iontas orm i gcónaí an bealach a n-éiríonn le Raidió na Gaeltachta teacht ar iriseoirí, tráchtairí nó gnáthdhaoine ar fud na tíre agus ar fud an domhain i gcónaí. Tá a fhios agam go bhfuil an t-uafás oibre taobh thiar den rud uilig.

Sa chomhthéacs sin, ní féidir a bheith sásta go bhfuil míchóthromaíocht i gceist ó thaobh scáileanna páde.

Tá an dualgas orainn mar Theachtaí Dála é a ardú i mbealach éagsúla. Chuala mé an freagra gur rud stairiúil é ach ní thuigim cén chaoi gur féidir le daoine a bheith ag déanamh an obair ceannann céanna nó níos mó oibre ar scáileanna pá níos ísle. Cén fáth go bhfuil Raidió na Gaeltachta ag glacadh leis sin?

Tagraím don phlean gníomhaíochta agus an Straitéis 20 Bliain don Ghaeilge. Beidh an tAire Stáit nua ag teacht os ár gcomhair i gceann coicís agus cuirfimid tús leis seo. An raibh Raidió na Gaeltachta bainteach leis an bplean seo nó an raibh sé mar chuid den chomhairliú a tharla? Cad iad na rudaí is tábhachtaí ó thaobh an plean gníomhaíochta seo ó thaobh Raidió na Gaeltachta?

Tagraím don taighde. Is rud iontach é go bhfuil taighde á dhéanamh ag Raidió na Gaeltachta le hOllscoil na hÉireann, Gaillimh. An dtabharfaidh na finnéithe tuilleadh sonraí? Tuigim nach bhfuil aon spriocdháta agus gur rud leanúnach é, ach an bhfuil conradh seirbhíse i gceist? Cá fhad atá sé? An bhfuil airgead i gceist nó an bhfuil an ollscoil ag obair i gcomhpháirtíocht le Raidió na Gaeltachta? Má tá, is rud iontach é sin. Má tá airgead i gceist, tabhair na sonraí dom maidir leis sin.

Tagraím do cheannairí gníomhach. Nílim ag iarraidh a bheith pearsanta ach maidir leis an ról, cá fhad atá an ról gníomhach? B'fhéidir go bhfuil ceist nó dhó eile agam ach is dócha go bhfuil siad go léir curtha ag an bpointe seo.