Aindrias Moynihan (Cork North West, Fianna Fail) | Oireachtas source

Gabhaim buíochas leis an gcathaoirleach agus as an gcur i láthair agus as an eolas. Bhí an-chuid ann. Bhí cúpla ceist ullmhaithe agam agus tá roinnt de na freagraí tagtha cheana féin.

Ar an gcéad dul síos teastaíonn uaim go bhfuil sé soiléir go bhfuil ardmholadh tuillte ag Raidió na Gaeltachta. Tá an-mheas ag an dream sa bhaile agus ar fud na tíre ar an tseirbhís agus tá sé agaibhse go seolfaidh sibh an teachtaireacht sin ar ais ag an stáisiún.

Tosaím le díriú isteach ar dhá ábhar faoi leith. Má tá aon dul chun cinn á dhéanamh teastaítear a bheith cinnte i gcónaí gur féidir leis an duine é a thomhas agus go mbeidh a fhios ag an duine cé chomh maith nó chomh holc is atá rudaí ag dul. Tuigim go bhfuil an deacracht leis an Joint National Listenership Research, JNLR, leis na figiúirí agus nach bhfuil an t-eolas ann agus is maith an rud é go bhfuil an t-uirlis taighde Fios Físe á úsáid. An bhfuil costas breise ag baint leis sin chun an taighde sin a chur ar fáil i gcomparáid leis na stáisiúin tráchtála? An bhfuil Raidió na Gaeltachta chun eolas breise a fháil nó an bhfuil ualach mór nó cén saghas costas atá i gceist maidir leis sin? Ní fheadar an bhfuil sé i gceist ag an stáisiún díriú isteach ar mhuintir Ghaeltachta, muintir na Gaeilge nó ar an daonra ar fad nó cé orthu a bheidh an taighde seo á dhíriú? Tá a fhios agam gur luadh rud éigin mar gheall ar Ghaeilgeoirí amháin nó an bhfuil sé i gceist dul i dtreo daoine nach bhfuil an Ghaeilge acu chomh maith, agus féachaint an féidir iad siúd a mhealladh go dtí an stáisiún? Má chuimhnítear ar an tslí a bhí ag TG4 cheana féin, nuair a bhí na cluichí ceannais de chraobhacha na hÉireann acu agus, go tobann, síneadh amach an stáisiún os comhair slua ollmhór nach mbeadh aon Ghaeilge acu.

Tarraingaoídh i dtreo TG4 iad. An bhfuil aon rud mar sin in aigne ag Raidió na Gaeltachta nó an bhfuil sé ag díriú ar mhuintir na Gaolainne amháin?

Tagraím do na foirne. Braithim go bhfuil an nuacht an-tábhachtach, ach go háirithe an nuacht áitiúil agus go mbeadh an ceangail ag Raidió na Gaeltachta leis an nGaeltacht i gcónaí agus go mbeadh na scéalta áitiúla ann. Cén plean atá ag Raidió na Gaeltachta chun go mbeadh tuairisceoirí áitiúla ann? An é go mbeidh daoine ó Bhaile na Gall mar shampla, ag taisteal soir siar thar Chúige Mumhan nó an mbeidh daoine áitiúil ag Raidió na Gaeltachta i gceantar Múscraí, i gceantar na Rinne, ar Chléire agus in Uíbh Ráthach? Conas a n-oibreoidh sé chun a chinntiú go mbeadh an nuacht áitiúil agus an eolas áitiúla ar fáil?