Dr. Pádraig Ó Tiarnaigh:

Tá rud amháin eile a rinne mé féin dearmad a lua. Tuigim go bhfuilimid ag an phointe ag a bhfuilimid, agus go bhfuil an tAcht Gaeilge chomh láidir agus chomh hard sin ar an chlár pholaitiúil, mar gheall ar an éileamh atá ag teacht ón phobal. Sílim gur luaigh Mr. de Spáinn é mar gheall ar an cheist líofa. Tá cúpla ceist eile. Tá pobal na Gaeilge anois ag rá go bhfuilimid i ndiadh fanacht i bhfad ró-fhada ar an cheist seo. Tá stocaireacht leanúnach i ndiadh dul ar aghaidh le deich mbliana agus 20 bliain ach le sé mhí anuas tá an cheist seo i ndiadh teacht ina ollcheist maidir le cúrsaí polaitíochta ó Thuaidh. Tá pobal na Gaeilge i ndiadh dul chun sráide arís agus arís eile. Sílim go raibh muid ar na sráideanna seacht nó ocht n-uaire ó Thuaidh ó mhí Eanair. Bhí muid i mBeál Féirste. Bhí na céadta daoine ar na sráideanna. Bhí cúpla agóid i nDoire. Bhí muid ag Stormont agus gach rud eile. Leiríonn an t-éileamh ar an tsráid an fearg atá ann i measc daoine. Ní mór go n-aithneofar an fearg sin agus go gcuirfear an reachtaíocht a ghealladh i bhfeidhm faoi dheireadh.