Rónán Mullen (Independent) | Oireachtas source

I dtosach báire, ba mhaith liom fáilte a chur roimh na finnéithe agus mo bhuíochas a ghabháil leo as bheith anseo. Is duine mise freisin a bhain taitneamh agus tairbhe as mo laethanta ollscoile i nGaillimh. Táim fíor-bhuíoch dairíre as na deiseanna a bhfuair mé i UCG, mar a bhí aithne ar an gcoláiste ag an am, ach go háirithe na buntáistí agus an tairbhe a bhain mé as na deiseanna a bhfuair mé ó thaobh cur le mo chumas sa Ghaeilge labhartha mar mhac léinn nach raibh Gaeilge á déanamh agam mar ábhar ollscoile - ní go hoifigiúil ar aon nós.

Tá mé an-amhrasach faoin gcinneadh seo. B'fhéidir gur féidir liom é seo a thógáil ceist ar cheist le go dtuigim i gceart. Gabh mo leithscéal nach bhfuil fhios agam, ba chóir go mbeadh fhios agam, ach an ndúirt an t-uachtarán nach raibh vóta ag an uachtarán ar an gcoiste rialaithe nó ar an údarás de gnáth? Sa chás seo, an raibh sé ann? Ar chaith sé vóta? Muna raibh sé ann, cén fáth?