Mr. Dónall Ó Braonáin:

Mar chuid den phróiseas a bhaineann le líonadh an phoist b'éigean plean gnó a réiteach a mhíneodh cén treo a bheadh faoin ndisciplín agus cén treo a bheadh faoin nua-Gaeilge mar roinn. Ní bhaineann an cúram liomsa go díreach ach mar chuid den phróiseas sin cuireadh céim nua i dtoll a chéile i gcomhar linn féin, idir roinn na Gaeilge agus an t-acadamh, agus is é an toradh a bhí air na go mbeadh bliain bhreise leis an BA sa Ghaeilge.

An toradh atá air ná go mbeidh bliain bhreise leis an BA sa nGaeilge agus go bhfuilimid ag díriú isteach ar chumas teanga. Chuireamar romhainn é seo sa bhliain 2014. Tá sé i gcroílár straitéis na hollscoile go mbeidh na mic léinn seo ag caitheamh tréimhse sa Ghaeltacht nó seimeastar Gaeltachta. Beidh socrúcháin oibre teanga-bhunaithe ina dhiaidh sin, rud a chuirfidh le hinfhostaíocht na mac léinn, táimid ag súil. Bhí sé sin mar chuid den phróiseas pleanála. Bhain an plé tamall maith míonna amach, is fíor sin. Mar chuid den phróiseas athbhreithnithe, thacaigh muid go láidir go líonfaidh an post agus rinneadh an moladh sin. Tá an post fógraithe faoi dheireadh.