Rónán Mullen (Independent) | Oireachtas source

Nílim ag rá gur Sir Humphrey atá i gceist lena leithéid d'fhreagra ach ní dúirt an finné gur fadhb ó thaobh an dlí atá i gceist. Dúirt sé go ndeir lucht HR go bhfuil fadhb ann. Cad é an fhadhb agus cén fáth nach mbeadh an creativity ag an ollscoil dul i ngleic leis an bhfadhb sin? Is léir go mbeidh go leor dualgas ar an gcéad uachtarán eile. Beidh ról le comhlíonadh aige nó aici. Cén fáth nach bhféadfaí a chinntiú go mbeadh mar dhualgas air nó uirthi go ndéanfadh sé nó sí méid áirid uaireanta de chúrsa? Rinne an Teachta Joe McHugh é nuair a cheapadh mar Aire Stáit é agus léirigh sé go raibh sé d'fhreagracht. Tá a fhios agam go ndearna sé é dá thoil féin é agus bheadh rudaí difriúla anseo ó thaobh an daonlathais de. Bheadh ceist bhunreachtúil, b'fhéidir, ag baint leis dá ndéanfaí iarracht é a chur sa dlí go mbeadh air Gaeilge a bheith aige. Ba léir go raibh sé cuí go ndéanfaí é go deonach.

Tá dualgas mór ar an ollscoil, áfach, mar chosantóirí na Gaeilge sa tír ar leibhéal acadúla. Dúirt an finné nach amháin coláiste réigiúnda an ollscoil ach coláiste náisiúnta le fís náisiúnta agus idirnáisiúnta. Sin an fís atá againne mar is í an Ghaeilge an phríomhtheanga oifigiúíl sa tír seo. Tá an Ghaeilge aitheanta go hidirnáisiúnta agus ar leibhéal an Aontais Eorpaigh mar theanga oifigiúil.