Éamon Ó Cuív (Galway West, Fianna Fail) | Oireachtas source

Deir an straitéís: "Beidh Aire sinsearach, ar a mbeidh lárfhreagracht maidir le cúrsaí Gaeilge fós ann." Dá mba rud é go raibh Aire sinsearach maidir le lárfhreagracht do chúrsaí Gaeilge, is eisean a bheadh istigh anseo ag freagairt dúinne maidir le cúrsaí Gaeilge. Briseadh an gealltanas sin i smidiríní. Is í an bhrí a bhí le sin, ná go mbeadh an tAire sinsearach ó lá go lá ag Bord an Rialtais agus anseo agus gach aon áit eile freagrach as an nGaeilge agus nach bhfágfaí faoi Aire Stáit í. Ba cheart an aireacht shinsearach a thabhairt don Aire Stáit má bhíodar ag tabhairt chúram na Gaeilge dó.