Ms Carmel Nic Airt:

Chomh fada is go mbaineann sé linne, an rud deireanach a dúradh linn ná nach mbunófaí aon scoil ag an meánleibhéil go dtí go mbeadh an polasaí don oideachas lasmuigh den Ghaeltacht foilsithe, agus ghlacamar go pointe leis sin. Má tá polasaí nua le cur i bhfeidhm, bheifeá ag súil go mbeadh sé curtha san áireamh go bhfuil áiteanna lasmuigh den Ghaeltacht a bhfuil scoileanna ag teastáil uathu, amhail is an cás atá againn thíos i gCorcaigh. Táimid tar éis an bóthar a bhuaileadh agus labhairt leis na meánscoileanna ar fad. Bhuaileamar leis na hoifigigh is sinsearaí san ETB. Taibhsíodh agus dealraíodh dúinn nach bhfuil suim acu ann mar go ndeir an ETB, dar leis na hoigifigh, nach bhfuil tacaíocht na Roinne ann dá leithéid.

Tá sé thar a bheith dian agus deacair dúinn glacadh leis sin sa mhéid is go bhfuilimid ag féachaint síos tollán anois ina mbeidh 1,000 go 1,200 dalta taobh istigh de sé bliana. D'fhéadfainn geallúint a leagadh dá dtiocfadh an bheirt againn thar n'ais anseo i gceann sé bliana, go mbeadh 1,200 dalta in iarthar Chorcaí gan an rogha agus fós tá sé ag rá linn nach féidir leis é sin a dhéanamh.

Iarradh orainn an t-éileamh a thaispeáint. Dheineamar píosa cuimsitheach taighde le tuismitheoirí rang a ceathair, rang a cúig agus rang a sé, mar bhíomar ag aithint go dtógfadh sé am scoil a bhunú. Bhí orainn labhairt le tuismitheoirí ón trí rang sin agus léirigh 77% suim ghníomhach agus suim láidir, ag cur in iúl dúinne go mbeadh oideachas lán-Ghaeilge mar chéad rogha acu ag an dara leibhéal dá mbeadh a leithéid ann. Go stairiúil, bhí cás ann inár gcás go raibh páistí ó iarthar Chorcaigh ag dul síos go Coláiste Íde sa Daingean. Chuaigh roinnt acu ann. Ach chun dul go dtí an Daingean ó Chloich na Coillte agus Cúirt Mhic Shéafraidh, táthar ag caint ar cheithre uair a chloig bóthair chun é a bhaint amach.